Steinar Skartland (55) er kåra til «Årets vikebu 2013». Det var ein overraska vinnar som laurdag blei hylla, og som repliserte med å framheva sine sambygdingar.

Mange var spente før offentleggjeringa under laurdagens julemesse. Ole Johan Espeland (10) og Mats Bjørnevik (8) synest det er vanskeleg å plukka fram ein favoritt til årets heiderstittel i Vikebygd, då det er så mange som fortener prisen. 
Spekulasjonane er mange. Rolf Alne, derimot, har ein klar vinnarkandidat i tankane.

— Dersom ikkje Steinar Skartland vinn prisen, blir eg sint, seier kjøpmannen.

Mange kandidatar


Steinar Skartland (55) er mannen bak Vikebygd.org, som er nettsida til den vesle bygda ved ålfjorden. Laila Espeland (43) seier at det er fleire gode kandidatar, mellom anna Roald Årvik som lagar til skogsløyper i området, og dei som driv gamletunet med bibliotek og kafé kvar onsdag.


«Du får oss til å skinne ut over heile verda

— Det er ei veldig kjekk kåring, meiner 43-åringen og viser til at vikebuen er kreative og flinke til å få i gang ting.

Dette er Skartland sjølv einige i. Han trekkjer på si side fram Andreas Ulveraker, korpsets dirigent, som ein verdig vinnar av prisen.

Fremjar bygda


Overraskinga for hovudpersonen vart dermed stor då Solveig Hortman ytra desse orda då årets vikebu skulle kunngjerast;

— Vi har bestemt at prisen i 2013 skal gå til ein person som får oss alle til å føle oss viktige. Vi blir sett ute i heile verda. Alle veit alt om oss i Vikebygd.

Ho utdjupar og viser til at heile 2,8 millionar har vore innom Vikebygd.org til no og at nettsida har gjennomsnittleg 300 besøkjande kvar dag.

— Du får oss til å skinne ut over heile verda, seier Hortman og gratulerer den andre vinnaren av tittelen «Årets vikebu», til stor applaus.

Audmjuk vinnar


Vinnaren sjølv vart utruleg glad for prisen, men var ikkje sein om å trekkja fram viktige personar for bygda i sin takketale. Han synest at Andreas Ulveraker har gjort ein fantastisk jobb med skulekorpset med sine 21 medlemmar og seks aspirantar.

— I tillegg til å vera ein fantastisk flink musikar, har han betydd enormt mykje for det som er av musikk her i bygda, utdjupar Skartland.

Deretter trekker han fram engasjementet i bygda.

— Ein står ikkje å slåss mot kvarandre med sine aktivitetar. Det er eit stort samspel. Det gjer at me får det til her i Vikebygd. Steinar Skartland har mange sterke meiningar om dette.
 Han er ikkje ein mann som framhevar seg sjølv, seier Kirsti Johannesen.

Alltid til stades

I tillegg til å fremja bygda sine aktivitetar på nett er Skartland aktiv i politikken og i kyrkjelyden. Årets vikebu sit inne med mykje kunnskap om heimstaden sin og ein merkar snart kor mykje han bryr seg om staden og folka som bur der.

— Visste du at det i 2012 var eit gjennomsnitt på 80 frammøtte i kyrkja, spør han smilande og forklarer det høge talet med at folk i bygda stiller opp med både korps og speidarar og gjer noko meir ut av det.

Skjer det noko i Vikebygd, stort eller smått, så står Skartland klar med kamera og skrivepenn.

— Det står ikkje mykje skandaløst på Vikebygd.org. Det er ikkje det eg er ute etter, ler han og takkar alle sambygdingane.