Det er 164 arbeidsledige i Vindafjord i januar, og det utgjer 3,6 prosent av arbeidsstyrken. Ved utgangen av januar er det 34 fleire ledige enn i desember. Det er arbeidsledige i Nav sitt register, og det er langt fleire arbeidsledige enn i januar 2013 då 85 var heilt utan arbeid.

Talet på arbeidsledige i Vindafjord er dermed meir enn dobla i løpet av fjoråret.

I industrien

— Det har nok samanheng med svingingar i industrien. Det er ein del jo-jo på Vestlandet når det går opp og ned med oppdrag. Men no har vi hatt høg aktivitet lenge, seier leiar for Nav i Vindafjord, Laila Thorsen.

Aktiviteten ved Westcon i Ølensvåg har stor betydning også for underleverandørar i distriktet. Westcon Yard og Westcon Power & Automation sagt opp 20 tilsette og permitteringar er på gang for over 100.

Permitteringar er ikkje med i arbeidsløysestatistikken.

I Rogaland er 2,2 prosent av arbeidsstyrken ledig, og det er godt under det tilsvarande talet for Vindafjord med 3,6 prosent ledige. Gjennomsnittet for landet er 3,0 prosent.

Thorsen kom til Nav Vindafjord i 2008 og har aldri opplevd så mange ledige før.

Betre i Etne

Vindafjord har langt fleire ledige enn nabokommunen Etne der 33 er heilt arbeidsledige hos Nav på Stord ved utgangen av den første månaden i 2014. Det er ein auke på fire personar samanlikna med desember.

Samanlikna med januar 2013, er det fem færre ledige i Etne i dag enn for eitt år sidan, og utviklinga er motsett veg av det som har skjedd i Vindafjord.

I alt 1,7 prosent av arbeidstyrken er ledige i Etne ved utgangen av januar.

For Sunnhordland er 2,1 prosent av arbeidsstyrken ledig, eller 618 personar. Det er nesten identisk med situasjonen for eitt år sidan. I januar er det litt færre permitterte enn i desember, 60 no mot 71  for ein månad sidan. På same tid i fjor var det 136 permitterte i dei sju kommunane i Sunnhordland.