Den dominerande europeiske varianten av H5N1-viruset vart påvist hos ei sjuk kvitkinngås i Rogaland i februar, som er den første påvisinga av denne varianten her i landet.
Fugleinfluensakoordinator og virolog ved Veterinærinstituttet, Ragnhild Tønnessen, forklarar at denne virusvarianten har forårsaka sjukdom spesielt blant villfugl som gjæser og svaner i Europa i vinter. Måsar og rovfugl er også utsette for viruset.
Veterinærinstituttet oppmodar til auka fokus på smittevern i fjørfehald over heile landet i tida framover, spesielt i fjørfetette delar av landet omgitt av våtmark. Tønnessen understrekar at kommersielle fjørfehald i heile landet bør gå gjennom biosikkerheitsrutinane sine jamleg.
– Dei utbrota vi har hatt av fugleinfluensa i kommersielle fjørfehald i Noreg har vore i Rogaland. Difor bør ein spesielt i denne regionen ha fokus på smittevern i fjørfehalda.
(©NPK)