Vossebanen er stengd for togtrafikk som følgje av uvêret. Her frå Voss sentrum torsdag formiddag. Uvêret er venta å auke i løpet av ettermiddagen. Foto: Ingerid Jordal / NTB / NPK
Vossebanen er stengd for togtrafikk som følgje av uvêret. Her frå Voss sentrum torsdag formiddag. Uvêret er venta å auke i løpet av ettermiddagen. Foto: Ingerid Jordal / NTB / NPK

Stengde veg og innstilte tog som følgje av uvêret

NTB-NPK
NPK-NTB: Ekstremvêret Jakob herjar på Vestlandet. Fleire vegar er stengde på grunn av ras eller fare for ras. Også togtrafikken blir ramma.

På fylkesveg 500 i Kvinnherad vart Halsnøytunnelen stengde på grunn av flaum, opplyser Vegtrafikksentralen vest i 14.40-tida.

Riksveg 13 er stengde fleire stader. Mellom Odda og Lofthus er vegen stengd på grunn av eit steinras, medan vegen er stengd ved Fatlaviki i Sogndal fordi fossen ved Fatlatunnelen kastar stein inn i vegbanen.

Fylkesveg 55 over Sognefjellet mellom Lom og Luster er stengt på grunn av uvêret. Ny vurdering kjem klokka 12 laurdag.

I tillegg har fylkesveg 49 vore stengde fleire stader, ifølgje Bergens Tidende.

Det kan dessutan bli aktuelt å stenge mellom anna E16 når mørket senkar seg. E16 er særleg utsett mellom Voss og Trengereid, opplyser Statens vegvesen til avisa.

Det har også gått fleire ras over mindre vegar. Mellom anna vart fylkesveg 5110 ved Tveitnes i øvre Hålandsdalen i Bjørnafjorden stengt to gonger få timar på grunn av ras.

Også toga blir ramma på grunn av uvêret og fare for ras, opplyser Vy. Bergensbanen er innstilt mellom Bergen og Ål, medan toga mellom Oslo og Ål køyrer som normalt. Vossebanen er heilt innstilt.

Det blir ikkje sett inn buss nokon av stadene.

(©NPK)