Fleire planlegg å ta påskeferie i år, viser ei fersk undersøking. Særleg hytteferie er populært blant nordmenn.

53 prosent av nordmennene skal ta fri denne påska. Det viser ei undersøking som Kantar har gjennomført for NHO Reiseliv.

Dette er likevel i strid med ei undersøking frå Virke tidlegare i år, som tyder på at andelen berre er 33 prosent.

Blant dei som tek ferie, blir åtte av ti i Noreg, ifølgje NHO-undersøkinga. 13 prosent reiser til Europa, og 3 prosent planlegg tur utanfor Europa.

Direktør Kristin Krohn Devold i NHO Reiseliv er begeistra over utviklinga, og ho meiner det er eit tydeleg teikn på at Noreg har attraktive reiselivstilbod.

– Dette er ei positiv utvikling for norsk reiseliv, seier Krohn Devold.

Færre skal stå på ski

NHO Reiseliv mistenkjer at det er den seine påska som er grunnen til at berre 19 prosent planlegg skitur i ferien.

Likevel er det fleire skidestinasjonar som har håpet oppe. Linn Ravndal Dyrkolbotn i Voss Resort opplyser at det er lagt til rette for ei ordinær påske med opne skianlegg kvar dag.

– Vi har nokså gode bookingtal så langt frå både norske og utanlandske gjester, seier Dyrkolbotn.

Kommunikasjonsansvarleg Amanda Wold Kortnes i Alpinco garanterer minst 20 kilometer preparerte løyper gjennom heile påska i Hafjell.

– Takka vera høgteknologiske preppemaskiner og god planlegging har vi full kontroll på snøsolen, seier Kortnes.

Ungdommen vil på spa

Hyttetur held fram med å vere den mest populære ferieforma i påska. Seks av ti ferierande nordmenn skal på hytta.

Likevel er det fleire som søkjer alternative ferieformer. Særleg blant dei under tretti år er det fleire som oppgir at dei har spa, helse og velvære på dagsordenen.

– Vi ser ein auke blant unge gjester som vil kombinera fjellturar med velværeopplevingar. Dei er klar over kvalitet og prioriterer både helse og hygge, seier Krohn Devold.

Elles skal 13 prosent av dei påskeferierande nyte ferien i campingvogn eller telt, og rundt 30 prosent skal på tur i naturen.

(©NPK)