Nyheitsstudio

Sp opp på ny måling – Ap går ned

Oppslutninga om Trygve Slagsvold Vedum og Senterpartiet aukar etter splittinga i regjeringa, viser ei ny måling i Nettavisen.

84 har fått innvilga sluttpakke i NRK

141 personar har søkt om sluttpakke i NRK, og 84 av dei har fått innvilga søknaden og sluttar. 15 søknader er framleis til behandling.

Det stadfestar organisasjonsdirektør Olav Hypher til Kampanje.

NRK må kutte 200 millionar kroner i 2025.

– NRK har også innført tilsetjingsstopp, og vi lèt vere å erstatte medarbeidarar som sluttar eller pensjonerer seg, seier Hypher.

Klubbleiar for NJ i NRK, Anne Berit Larsen, er glad for at dei unngår ei styrt nedbemanning.

– Vi er svært glade for å ha komme i mål med frivilligheit, sjølv om det er ein litt vemodig dag med blanda kjensler, seier ho.

(©NPK)

Norsk Tipping vedgår feil i trekkinga: – Veldig alvorleg

Norsk Tipping har avdekt ein feil i måten i Eurojackpot-trekkinga blir gjennomført på. Det har medført at eit andelslag har vunne store summar på kort tid.

Det er VG som får stadfesta av spelselskapet at det har vore gjort det som overfor avisa blir omtalt som ein veldig alvorleg feil.

Bakgrunnen er at andelslag vann den nasjonale ekstrapremien på éin million kroner heile fire gonger over ein periode på berre to månader.

Det fekk Norsk Tipping til å setje i gang undersøkingar i saka.

– Analysen viser at andelsspelarar er overrepresenterte blant vinnarane av den norske millionpremien. Det ser ut til å komme av ein feil i eit oppsett i spelmotoren vår, seier kommunikasjonsrådgivar Roar Jødahl til VG.

No stansar Norsk Tipping moglegheita for andelsspel på Eurojackpot. Selskapet understrekar at feilen ikkje gjeld andre typar pengespel.

I Eurojackpot blir det etter kvar trekking delt ut ein ekstrapremie på éin million kroner til ein norsk spelar. Det er denne premien andelsspelarar har hatt ein for stor sjanse til å stikke av med.

– Det kan sjå ut som om kvar enkelt andelsspelar har fått like mange «lodd i hatten» som heile andelslaget skulle hatt, seier Roar Jødahl, som kallar feilen veldig alvorleg.

Han stadfestar at andelslag som eksempelvis skulle hatt 1600 lodd i trekkinga, har enda opp med å få 1600 lodd per medlem i laget.

Norsk Tipping opplyser at det blir jobba med å rette feilen.

(©NPK)

Arbeidarpartiet kuttar straumprisen – vil ha fast Noregspris på 40 øre

Arbeidarpartiet vil kutte straumprisane og foreslår å innføre ein fastpris på 40 øre per kilowattime (kWh) for heile landet.

– Med Noregspris gir vi folk kontroll over straumprisen. Viss det viktigaste er å ha føreseielegheit, vil ein fast pris på 40 øre per kilowattime kunne vere eit godt alternativ til straumstøtte, seier Jonas Gahr Støre.

Fastprisen på 40 øre/kWh vil vere eit valfritt alternativ til dagens straumstøtteordning, der staten dekkjer 90 prosent av kostnadene i enkelttimar der spotprisane er høgare enn 75 øre/kWh

– Vi gir folk eit val mellom to ulike ordningar, og dei kan sjølv avgjere kva som er rett ordning for dei, seier Støre vidare.

Fastprisen skal gjelde for hushald og fritidsbustader og er basert på historiske gjennomsnittsprisar og forventa framtidige prisar.

Regjeringa tek sikte på at fastprisordninga kan tre i kraft seinast 1. oktober 2025. Støre la fram planane på ein pressekonferanse med energiminister Terje Aasland (Ap) fredag formiddag.

Arbeidarpartiet vil i tillegg kutte momsen på nettleiga frå 25 prosent til 15 prosent frå og med 1. juli. Ein går ut frå at hushalda vil spare om lag 1,8 milliardar kroner i året på dette tiltaket.

Vestland i toppen i tømmerhogsten

Tømmerhogsten i Noreg nådde rekordhøgder i 2024, med om lag 12 millionar kubikkmeter tømmer seld til industriføremål.

Dette representerer ein auke på 336.000 kubikkmeter frå det førre rekordåret 2022, skriv Landbruks- og matdepartementet i ei pressemelding.

Sjølv om fylka på Austlandet framleis står for 75 prosent av den norske avverkinga, er det kystfylka som har opplevd den største auken dei siste to åra. Trøndelag og Vestland leia an i denne utviklinga. Landbruks- og matdepartementet peikar på fleire moglege årsaker til denne trenden, mellom anna gunstige prisar, gode driftsforhold, betre tilgang på driftskapasitet og auka moglegheiter for båttransport gjennom nye tømmerkaier.

(©NPK)

Sp-exit: – Distriktsnæringslivet kan juble

Senterpartiet (Sp) går ut av regjeringssamarbeidet med Arbeidarpartiet (Ap) og vi går inn i ein valkamp utan eit klart regjeringsalternativ på raud-grøn side. «Distriktspsykopaten» meiner Sp-exiten er godt nytt for næringslivet i distrikta.

EU gir 86 millionar til norsk prosjekt for stillare hav

EU løyver 86 millionar kroner til eit norskstyrt prosjekt som skal redusere støy frå skip.

Den norske næringsklyngja Maritime CleanTech leier det europeiske samarbeidet, som inkluderer norske aktørar som Kongsberg Maritime, Bergen Engines og Sintef Ocean.

Det fireårige prosjektet skal demonstrere nye metodar for å redusere undervasstøy frå skip. Prosjektet skal utvikle støydempingsteknologiar og nye bransjepraksisar som kan nyttast både for nye og ombygde fartøy.

Fem ulike skip, mellom anna Hurtigruten-ekspedisjonsskipet «Roald Amundsen», skal teste effekten av banebrytande teknologiar. Prosjektet skal også utvikle avanserte system om bord for å spore støyutslepp frå skipa.

– Når vi no går saman for å utvikle nye støydempingsteknologiar vil vi få fram nye praksisar for meir miljøvennleg skipsfart, seier administrerande direktør Ada Jakobsen i Maritime CleanTech.

(©NPK)

Lågare gjeldsvekst for hushalda

Gjeldsveksten for hushalda var på 3,7 prosent i desember. Tolvmånadersveksten har dermed gått ned frå 3,9 prosent i november.

Gjeldsveksten i hushalda har stige jamt sidan botnnivået i april, men fell altså igjen i desember, viser tal frå Statistisk sentralbyrå
(SSB).

Den innanlandske gjelda i hushalda var på 4449 milliardar kroner ved utgangen av desember, mot 4300 milliardar kroner ved utgangen av 2023.

1. januar tredde endringane i utlånsforskrifta i kraft. Den viktigaste endringa var å senke eigenkapitalkravet for bustadlån frå 15 til 10 prosent.

Utlånsveksten til hushalda var svært låg i desember.

– Det blir interessant å følgje med på utviklinga framover og å sjå om gjeldsveksten for hushalda tek seg opp igjen frå januar, seier førstekonsulent John Galleberg i SSB.

Gjeldsveksten i ikkje-finansielle føretak var i desember på 1,3 prosent, ned frå 2 prosent i november.

Gjeldsveksten i kommunane har hatt ei anna utvikling enn dei andre sektorane og lege på eit høgare nivå det siste året. Tolvmånadersveksten var 7,2 prosent i desember, ned frå 7,6 prosent i november. Gjeldsveksten er dermed monaleg redusert sidan toppnivået på 10 prosent i juli, men ligg framleis godt over dei andre sektorane.

Den samla innanlandske gjelda til kommunane var på 760 milliardar kroner ved utgangen av desember, mot 709 milliardar kroner ved utgangen av 2023.

(©NPK)

Støre: Ikkje aktuelt å innføre resten av den omstridde EU-pakken

Det er ikkje aktuelt å innføre dei resterande fem direktiva i EUs energipakke, seier statsminister Jonas Gahr Støre (Ap).

LO-leiaren jobbar for ny Ap og Sp-regjering etter valet

LO-leiar Peggy Hessen Følsvik vil jobbe for eit raudgrønt regjeringssamarbeid som også inkluderer Senterpartiet (Sp) etter neste stortingsval.

Sp trekkjer seg frå regjeringa – peikar på Støre som framleis statsminister

Senterpartiet går ut av regjeringa som følgje av usemja med Arbeidarpartiet om direktiva i EUs energipakke. Partiet meiner samtidig det er naturleg at Støre held fram som statsminister.

Mowi kjøper seg opp i Nova Sea – pungar ut 7,4 milliardar kroner

Noregs største lakseoppdrettar Mowi kjøper seg opp til ein eigardel på 95 prosent i Nova Sea. Mowi pungar ut med 7,4 milliardar kroner i oppkjøpet.

Liten auke i talet på narkosaker – mindre heroin, meir MDMA og steroid

Talet på narkotikasaker som politiet registrerer, har auka med 12 prosent det siste året. Samtidig er mengda langt under toppåra på 2010-talet.

Nav: Endå fleire treng sosialhjelp

Førebelse tal frå Nav viser at talet på personar som fekk sosialhjelp, auka med 15 prosent i 2024. Utbetalingane i kroner auka med 23 prosent.

Straumprisen for folk flest har gått mykje ned sidan 2022

Straumprisen i Sør-Noreg har gått mykje ned dei siste åra. Sjølv i området med høgast pris i 2024 var snittprisen rundt 40 prosent lågare enn i 2022.